Il-Lapidi tal-irħam intarsjat li jiksu l-art huma karatteristika unika tal-Knisja ta’ San Ġwann. L-art kollha tan-nava, tal-kappelli u tal-oratorju huma miksija b’lapidi. Dawn jikkommemoraw uħud mill-iktar kavallieri ta’ fama tal-Ordni. Bosta kienu membri ta’ familji aristokratiċi b’saħħithom fl-Ewropa. Huma kellhom pożizzjonijiet għolja ta’ prijuri, ammirali u uffiċjali ġudizzjarji fost oħrajn, u kienu ta’ spiss jirreferu għalihom bħala ‘Sinjur Fra L-aktar Glorjuż’, lllustrissimus Dominus Frater. L-epitaffi Latini jiddeskrivu l-virtujiet ta’ kull Kavallier. Kull lapida mimlija b’messaġġi ta’ trijonf, fama, rebħ u mewt. Is-simboli, kemm ekkleżjastiċi kif ukoll profani, jintużaw f’lingwa viżiva vibranti ta’ kuluri u disinji. Wieħed mis-simboli l-aktar popolari hu l-immaġni tal-mewt, irrappreżentata bħala skeletru, sikwit b’minġel u klessidra li tfisser il-mixja taż-żmien. Simbolu popolari ieħor huwa l-anġlu tal-fama, ta’ spiss irrappreżentat qed jonfoħ trumbetta biex jenfasizza r-reputazzjoni onorabbli tal-mejjet. Kuruni u kurunetti jindikaw l-aktar kavallieri nobbli. Is-simboli huma akkumpanjati minn tarki u armi li jvarjaw minn bnadar tal-battalji sa alabardi, elmi u korazzi. Il-lapidi kollha saru fuq disinji oriġinali u magħmula minn irħam intarsjat ikkulurit. Dawn imorru lura għall-bidu tas-seklu sbatax sal-aħħar tas-seklu tmintax.